اسلام آباد (بگ ڈیجٹ) اسلام آباد ہائی کورٹ: جسٹس بابر ستار کا عبوری آرڈر معطل ہونے پر نیا تنازعہ

اسلام آباد (بگ ڈیجٹ) اسلام آباد ہائی کورٹ میں جسٹس بابر ستار کے عبوری آرڈر کے معطل ہونے پر نیا تنازعہ کھڑا ہو گیا ہے۔

جسٹس بابر ستار نے 26 مارچ کے کیس کے مقرر ہونے کے حکم کے خلاف جوڈیشل انتظامیہ کی عدم پیروی پر سخت برہمی کا اظہار کیا ہے۔
انہوں نے کہا کہ 12 اور 26 مارچ کے عبوری آرڈرز تھے اور ان کا حتمی فیصلہ ابھی آنا باقی ہے۔

جسٹس بابر ستار نے وضاحت دی کہ چیف جسٹس کے پاس زیر سماعت کیس میں انتظامی سائیڈ پر مداخلت کا کوئی اختیار نہیں ہے۔عدالت نے اس بات پر بھی سوال اٹھایا کہ کیوں ڈپٹی رجسٹرار جوڈیشل نے عدالتی حکم کے باوجود کیس کو سماعت کے لیے مقرر نہیں کیا۔ جسٹس بابر ستار نے ڈپٹی رجسٹرار جوڈیشل اور آئی ٹی کو آئندہ سماعت پر ذاتی حیثیت میں طلب کیا اور ان سے یہ وضاحت طلب کی کہ کس کے حکم پر جوڈیشل آرڈرز ویب سائٹ سے ہٹا دیے گئے۔

اس موقع پر جسٹس بابر ستار نے کہا کہ اگر کیس کازلسٹ میں شامل نہ کیا جائے تو بھی 7 مئی کو سماعت کی جائے گی۔ انہوں نے یہ بھی کہا کہ ریکارڈ کو اس عدالت میں بھیجا جائے اور تمام فریقین کو حکم کی کاپی بھیجی جائے تاکہ وہ آئندہ سماعت پر اپنی حاضری یقینی بنائیں۔یہ تنازعہ عدالتی انتظامیہ کے عمل اور عدالتی احکام کی خلاف ورزی سے متعلق سنگین قانونی سوالات اٹھاتا ہے۔