اسلام آباد (بگ ڈیجٹ) ایرانی سفیر کی یوم القدس پر عالمی یکجہتی کی اپیل

تحریر: ریحان خان

اسلام آباد، بدھ، 26 مارچ 2025 (بگ ڈیجٹ): پاکستان میں ایران کے سفیر، ڈاکٹر رضا امیری مقدم نے بدھ کے روز فلسطینی کاز کے لیے ایران کی غیر متزلزل حمایت کا اعادہ کرتے ہوئے عالمی برادری پر زور دیا کہ وہ قبضے اور جبر کے خلاف متحد ہو۔

وہ بین الاقوامی یوم القدس کے سلسلے میں منعقدہ افطار ڈنر سے خطاب کر رہے تھے، جو ہر سال رمضان المبارک کے آخری جمعہ کو منایا جاتا ہے۔ ایرانی سفیر نے اس موقع پر کہا کہ یوم القدس مسلم امہ کے اتحاد کی علامت ہے، جو فلسطینی عوام کے حق خودارادیت کی حمایت کرتا ہے۔

انہوں نے کہا کہ “یوم القدس، جو 1979 میں بانی انقلاب اسلامی ایران امام خمینیؒ نے متعارف کرایا، فلسطینی عوام کی مسلسل جدوجہد کی ایک طاقتور یاددہانی ہے۔”

ڈاکٹر مقدم نے غزہ میں جاری مظالم کی مذمت کرتے ہوئے اسے ‘صہیونی جارحیت’ قرار دیا اور بعض عالمی طاقتوں پر الزام عائد کیا کہ وہ ایسے اقدامات کی پشت پناہی کر رہے ہیں، جن کے نتیجے میں عام شہریوں کی بڑی تعداد میں ہلاکتیں ہو رہی ہیں۔

انہوں نے کہا کہ “گزشتہ ڈیڑھ سال کے دوران، غزہ پر وحشیانہ حملوں میں 55,000 سے زائد معصوم بچے، خواتین اور مرد شہید ہو چکے ہیں، جبکہ بڑے پیمانے پر نقل مکانی اور بنیادی ڈھانچے کی تباہی بھی جاری ہے۔”

ایرانی سفیر نے فلسطینی قیدیوں کے تبادلے سے متعلق حالیہ پیش رفت کا حوالہ دیتے ہوئے کہا کہ یہ قابض قوتوں کی جانب سے پھیلائے گئے جھوٹ کا ایک اور ثبوت ہے۔

انہوں نے مزید کہا کہ “فلسطینی مزاحمت کی قوت کمزور نہیں ہوئی، بلکہ تاریخ گواہ ہے کہ آزادی کی جدوجہد ظلم کے مقابلے میں مزید مضبوط ہوتی ہے۔”

ڈاکٹر مقدم نے اسرائیل اور اس کے حامیوں پر الزام عائد کیا کہ وہ غزہ اور یمن میں فوجی کارروائیوں کے ذریعے خطے میں کشیدگی بڑھا رہے ہیں تاکہ قبضے کی ‘اسٹریٹجک ناکامی’ سے دنیا کی توجہ ہٹائی جا سکے۔

انہوں نے پاکستان کے اصولی موقف کو سراہتے ہوئے کہا کہ حکومت اور عوام کی جانب سے فلسطینی عوام کی حمایت انصاف کے لیے امید کی کرن ہے۔

ایرانی سفیر نے مطالبہ کیا کہ فلسطین میں آزاد اور خودمختار ریاست کا قیام عمل میں لایا جائے، جہاں تمام مقامی فلسطینیوں کی شمولیت کے ساتھ جمہوری انتخابات منعقد کیے جائیں۔

انہوں نے کہا کہ “یوم القدس محض ایک رسم نہیں بلکہ یہ قبضے، قتل عام اور نسل پرستی کے خلاف ایک عالمی تحریک ہے، جو فلسطینی عوام کے حقوق کی بحالی کے لیے جدوجہد کر رہی ہے۔”

ڈاکٹر مقدم نے مسلم ممالک اور دنیا بھر کے انصاف پسندوں پر زور دیا کہ وہ یوم القدس کی تحریک میں بھرپور شرکت کریں تاکہ فلسطینی مسئلے کے منصفانہ حل کے لیے عالمی آواز کو مزید تقویت دی جا سکے